Astrobotic kompaniyasi Chakram raketa dvigateli sinovlarini muvaffaqiyatli yakunladi
AQShning Astrobotic kompaniyasi Chakram deb nomlangan yangi avlod raketa dvigatelining sinovlari ijobiy natija berganini e'lon qildi. Bu haqda Zamin.uz xabar berdi. Mazkur qurilma rotatsion detonatsion dvigatellar turiga mansub bo'lib, unda yonish jarayoni kamera ichida tovushdan yuqori tezlikda harakatlanuvchi to'lqin orqali amalga oshadi. NASAning Marshall nomidagi kosmik markazida o'tkazilgan ushbu tajribalar texnologiya rivoji uchun muhim bosqich bo'ldi.
Mutaxassislarning qayd etishicha, ushbu texnologiya an'anaviy suyuqlik bilan ishlaydigan dvigatellarga nisbatan tortish kuchi va massa mutanosibligini sezilarli darajada yaxshilash imkonini beradi. Sinovlar davomida ikki prototip jami 470 soniya davomida faoliyat ko'rsatdi.
Xususan, qurilmaning 300 soniya davomida to'xtovsiz yonishi ushbu turdagi texnikalar uchun rekord ko'rsatkich sifatida qayd etildi. Dvigatellar 18 kN dan ortiq tortish kuchini hosil qilgan bo'lsa-da, sinov yakunida konstruksiyada hech qanday texnik shikastlanishlar kuzatilmadi.
Loyiha bosh tadqiqotchisi Brayant Avalosning so'zlariga ko'ra, mexanizm kutilgan ko'rsatkichlardan yuqori barqarorlikni namoyish etgan. Astrobotic vakillari erishilgan natijalar dunyodagi eng yuqori ko'rsatkichlardan biri ekanini ta'kidlamoqda.
Chakram dasturi NASA bilan hamkorlikda 3D-bosma texnologiyasi asosida amalga oshirildi. Bu uslub xarajatlarni qisqartirish va loyihani tezlashtirishga xizmat qildi.
Kompaniya cheklangan budjet va kichik jamoa bilan bunday yutuqqa erishilganiga e'tibor qaratdi. Yangi dvigatellarni 2026 yil yakunida parvoz qilishi kutilayotgan Griffin qo'nish moduliga o'rnatish rejalashtirilgan.
Shuningdek, ushbu ishlanma ko'p marta qo'llaniladigan suborbital apparatlar uchun ham moslashtiriladi.
