Grem Sayks dunyodagi eng tezkor bug'li mototsiklni yaratdi
Buyuk Britaniyalik 62 yoshli muhandis Grem Sayks rafiqasi bilan hamkorlikda "Force of Nature" deb nomlangan noyob bug'li mototsiklni loyihalashtirdi. Bu haqda Zamin.uz xabar berdi. Ushbu texnika Santa Pod trassasida o'tkazilgan poyga sinovlarida yuqori ko'rsatkichlarni qayd etdi. Qurilma 400 metr masofani 5,5 soniyada bosib o'tib, jahonning eng tezkor mototsikllari reytingida ikkinchi o'ringa ko'tarildi.
Mototsiklning texnik ishlash prinsipi an'anaviy bug' dvigatellaridan farq qiladi. Maxsus idishda 120 litr hajmdagi o'ta tozalangan suv 260 darajagacha isitiladi.
Tizim ishga tushirilganda, suv 50 atmosfera bosimi ostida tovushdan tez tezlikda tashqariga haydaladi va bir zumda bug'ga aylanadi. Mazkur jarayonda har soniyada 40 litr suv sarflanishi ma'lum qilindi.
O'tkazilgan sinovlar davomida Sayks bug'li texnikalar orasida yangi jahon rekordini o'rnatdi. Mototsikl 201 metr masofada 338 km/soat tezlikka erishgan.
Muhandisning ta'kidlashicha, start vaqtida haydovchi 6 g darajasidagi yuklamani his qiladi. Olti yildan buyon takomillashtirilayotgan loyihaning hozirda beshinchi versiyasi sinovdan o'tmoqda.
Muallif kelajakda 400 metrli masofani 5 soniyadan kamroq vaqtda bosib o'tishni rejalashtirgan. Biroq, ushbu texnologiyadan kundalik transport vositalarida foydalanish ko'zda tutilmagan.
Yuqori bosim va harorat darajasi haydovchi hamda atrofdagilar xavfsizligiga jiddiy tahdid solishi sababli texnika faqat maxsus poligonlar uchun mo'ljallangan.
