Blackbird droni yangi tezlik rekordini o‘rnatishga muvaffaq bo‘ldi

AQShlik ikki nafar dron ishqibozi ochiq havoda Blackbird deb nomlangan modifikatsiya qilingan qurilmaning sinov parvozini muvaffaqiyatli amalga oshirdi. Bu haqda Zamin.uz xabar berdi.

Ixbt.com nashrining xabar berishicha, mazkur parvoz davomida dron soatiga 730 kilometr (453 mil/soat) maksimal tezlikka erishib, norasmiy jahon rekordini yangilashga muvaffaq boʻldi. Taqqoslash uchun, tijoriy avialaynerlarning oʻrtacha parvoz tezligi soatiga 885 kilometrni tashkil etadi.

Loyihaning mualliflari 2025-yil dekabr oyida soatiga 626 kilometr tezlik bilan avvalgi rekordni oʻrnatishgan edi, biroq keyinchalik bu natija boshqa muhandislar tomonidan yangilangan. Birinchilikni qaytarib olish maqsadida mutaxassislar dronni butunlay yangi propellerlar bilan jihozlashdi va jarayonni YouTube platformasi orqali keng jamoatchilikka namoyish etishdi.

Yoʻnalishdosh shamol yordamida oʻtkazilgan sinovda dron 453 mil/soat tezlikka chiqib, kutilgan 441 mil/soat koʻrsatkichidan oshib ketdi. Shamol taʼsiri chiqarib tashlanganda, qurilmaning sof tezligi soatiga 674 kilometrni tashkil qildi.

Qarama-qarshi shamolga qarshi amalga oshirilgan yakuniy sinovda esa 640 km/soat natija qayd etildi. Ikkala yoʻnalishdagi oʻrtacha tezlik soatiga 685 kilometrga teng boʻldi.

Garchi bu natija rejalashtirilgan 434 mil/soat marrasiga toʻliq yetmagan boʻlsa-da, amaldagi jahon rekordini yangilash uchun yetarli boʻldi. Mazkur texnologik yutuq dronlarning zamonaviy aviatsiya sohasidagi imkoniyatlari tobora kengayib borayotganini yana bir bor tasdiqladi.