Honor 600 Pro Xitoyda rekord sig‘imli batareya bilan taqdim etildi

Honor kompaniyasi Xitoy bozorida oʻzining yangi Honor 600 Pro smartfonini rasman taqdim etdi. Bu haqda Zamin.uz xabar berdi.

Mazkur qurilmaning mahalliy bozordagi versiyasi Yevropa va boshqa global variantlardan texnik xususiyatlari boʻyicha sezilarli darajada farq qiladi. Ixbt.com manbasiga koʻra, asosiy farq akkumulyator sigʻimida kuzatiladi: xalqaro bozorda 6400 mAs quvvatga ega batareya oʻrnatilgan boʻlsa, Xitoy modeli rekord darajadagi 8000 mAs sigʻimli akkumulyator bilan jihozlangan.

Qurilmaning apparat taʼminoti ham oʻzgartirilgan. Global versiyada Snapdragon 8 Elite protsessori qoʻllanilsa, Xitoy uchun moʻljallangan modelda Dimensity 8550 Elite chipi oʻrnatilgan.

Smartfon 6,57 dyuymli, 2728 x 1264 pikselli AMOLED ekran bilan jihozlangan boʻlib, u 120 Gs yangilanish chastotasini qoʻllab-quvvatlaydi. Koʻzni himoya qilish maqsadida joriy etilgan 3840 Gs chastotali PWM texnologiyasi ekranning miltillashini bartaraf etadi.

Optik tizim ham yuqori texnik koʻrsatkichlarga ega. Asosiy modul 200 megapikselli sensor, F/1,9 diafragma va optik barqarorlashtirish tizimi bilan taʼminlangan.

Shuningdek, 50 megapikselli periskop linza va 12 megapikselli oʻta keng burchakli sensor ham mavjud. Old kamera esa 50 megapikselli aniqlikdagi tasvirlarni taqdim etadi.

Qurilma 80 Vt simli va 50 Vt simsiz quvvatlanish imkoniyatiga ega. Smartfon Wi-Fi 7, Bluetooth 6.0, NFC hamda IP68/IP69K himoya standartlari bilan boyitilgan.

Savdoga chiqarilgan 12/256 GB xotirali model 500 dollar, 16/512 GB talqini esa 615 dollar etib belgilangan. Bundan tashqari, kompaniya batareyasi yanada sigʻimliroq, biroq narxi arzonroq boʻlgan Honor 600 Super Edition modelini ham keng omma eʼtiboriga havola qildi.