"Morgan" kompaniyasi tarixidagi eng kuchli rodstermi taqdim etdi
Britaniyaning "Morgan" avtomobil ishlab chiqaruvchisi o'zining eng yuqori texnik ko'rsatkichlarga ega modeli hisoblangan "Supersport 400" rodsterini e'lon qildi. Bu haqda Zamin.uz xabar berdi. Ushbu sportkar brend tarixidagi eng quvvatli seriyali avtomobil sifatida qayd etildi. Mashina kapoti ostidan 3,0 litr hajmli, 402 ot kuchiga ega BMW turbo dvigateli joy olgan bo'lib, bu ko'rsatkich bazaviy versiyaga qaraganda 67 ot kuchiga ko'pdir.
Texnik ma'lumotlarga ko'ra, dvigatelning aylanish momenti 500 Nm darajasida saqlangan. Quvvat oshishi hisobiga rodster 100 km/soat tezlikka 3,6 soniyada erishadi.
Avtomobilning maksimal tezligi soatiga 290 kilometrni tashkil etadi. Mazkur model faqat 8 pog'onali avtomat uzatmalar qutisi bilan ta'minlangan.
Muhandislar quvvatni oshirish jarayonida sportkar vaznini 1 170 kilogramm darajasida saqlab qolishga muvaffaq bo'lishdi. Shuningdek, "Supersport 400" modeli 19 dyuymli quyma g'ildirak disklari, Michelin Pilot Sport 5 shinalari va takomillashtirilgan osma tizim bilan jihozlangan.
Xaridorlar rodsterni qattiq yoki yumshoq yopiladigan tom variantlarida tanlashlari mumkin. Yevropa bozorida yangi sportkarning boshlang'ich narxi 138 958 yevro etib belgilandi.
