Microsoft Copilot pullik obunachilari soni 20 millionga yetdi

Microsoft 365 tizimidagi Copilot sun'iy intellekt xizmatidan foydalanuvchilar soni 20 millionga yetdi

Microsoft korporatsiyasi M365 ilovalariga integratsiya qilingan Copilot sun'iy intellekt xizmatidan foydalanuvchilar soni va ularning faolligi keskin o'sib borayotganini e'lon qildi. Bu haqda Zamin.uz xabar berdi.

Kompaniya bosh direktori Satya Nadella choraklik hisobot konferensiyasida hozirda pullik korporativ foydalanuvchilar soni 20 million nafarga yetganini ta'kidladi. Techcrunch.com nashrining xabar berishicha, 50 000 dan ortiq litsenziya xarid qilgan tashkilotlar miqdori o'tgan davrga nisbatan to'rt barobar oshgan.

Yirik xalqaro korporatsiyalar ushbu texnologiyani joriy etishda yetakchilik qilmoqda. Xususan, Bayer, Johnson & Johnson, Mercedes va Roche kabi kompaniyalar 90 000 tadan ortiq litsenziyaga ega.

Accenture kompaniyasi bilan imzolangan 740 000 dan ortiq litsenziyani ko'zda tutuvchi shartnoma hozirgacha qayd etilgan eng yirik kelishuv bo'lib turibdi. Nadellaning qayd etishicha, foydalanuvchilarning sun'iy intellekt bilan ishlash chastotasi elektron pochta xizmatlari darajasiga yetgan.

Har bir foydalanuvchi tomonidan yo'llanayotgan so'rovlar miqdori har chorakda qariyb 20 foizga ortmoqda. Haftalik faollik ko'rsatkichlari bo'yicha Copilot hozirda Outlook dasturi bilan bir xil mavqega ega.

Texnologik jihatdan Copilot faqat OpenAI modellariga tayanib qolmasdan, ko'p modelli tizimda ishlamoqda. Foydalanuvchilar chat jarayonida bir nechta modeldan, jumladan, Anthropic kompaniyasining Claude modelidan ham foydalanish imkoniyatiga ega.

Morgan Stanley tahlilchisi Kit Veys Microsoft 365 Copilot ko'rsatkichlari kutilganidan ancha yuqori ekanini bildirdi. Shuningdek, o'tgan haftadan boshlab Word, Excel va PowerPoint dasturlarida Agent rejimi standart formatga o'tkazilishi foydalanish ko'lamini yanada kengaytirmoqda.