Intel Arc G3 protsessori sinovlarda Ryzen Z2 modelini ortda qoldirdi

Intel Arc G3 Extreme protsessori portativ konsollar bozorida Ryzen Z2 Extreme modelidan o'zib ketdi

Portativ o'yin qurilmalari uchun ishlab chiqilgan Intel Arc G3 Extreme protsessori dastlabki sinovlarda Ryzen Z2 Extreme ko'rsatkichlarini ortda qoldirdi. Bu haqda Zamin.uz xabar berdi.

Hozircha qurilmaning faqat markaziy hisoblash qismi bo'yicha ma'lumotlar e'lon qilindi. Ixbt.com nashrining yozishicha, ushbu protsessor 14 ta yadroga ega bo'lib, ular 2+8+4 konfiguratsiyasida joylashgan.

Shuningdek, u Arc B390 grafik tizimi bilan jihozlangan. Texnik jihatdan ushbu model ikkita yirik yadrosi faol bo'lmagan Core Ultra X protsessorini eslatadi.

PassMark testlari natijasiga ko'ra, Intel mahsuloti 29 600 dan yuqori ball to'plashga muvaffaq bo'ldi. Uning asosiy raqobatchisi hisoblangan Ryzen Z2 Extreme esa 23 650 ball qayd etgan.

AMD protsessori uchta Zen 5 va beshta Zen 5c yadrolari bilan ta'minlangan. Intel yangiligida yadrolar soni ko'proq bo'lishiga qaramay, AMD yadrolari giperoqim texnologiyasini qo'llab-quvvatlaydi.

Grafik imkoniyatlar bo'yicha hali to'liq qiyosiy tahlillar o'tkazilmagan bo'lsa-da, Arc B390 grafik chipi Radeon 890M modelidan ancha samarali ekani ta'kidlanmoqda. Internetda Arc G3 Extreme protsessori bilan jihozlangan birinchi portativ konsol haqida xabarlar paydo bo'ldi.

Mazkur qurilma Ryzen Z2 Extreme bazasidagi raqobatchilaridan yuqoriroq narxda sotilishi kutilmoqda.