Senegallik taniqli futbolchi Sadio Mane o‘zining ona qishlog‘i Bambalida yirik agrosanoat loyihasini hayotga tatbiq etmoqda. Bu haqda Zamin.uz xabar berdi.
Ushbu tashabbus mintaqa iqtisodiyotini rivojlantirish va mahalliy aholi uchun yangi ish o‘rinlarini yaratishga qaratilgan. SM10 Agro deb nomlangan mazkur loyihaning rasmiy tamal toshi 19 sentyabr kuni qo‘yildi.
Bu haqdagi ma’lumotlarni Senegalning RTS milliy telekanali o‘z dasturlarida e’lon qildi. Mutaxassislarning baholashicha, loyihaning umumiy qiymati 11,7 milliard G‘arbiy Afrika CFA frankini tashkil etib, bu taxminan 20 million dollarga teng keladi.
Modernizatsiya qilinayotgan xo‘jalik hududi qariyb 500 gektar maydonni egallaydi. Rejaga ko‘ra, mazkur yerlarda 78 mingga yaqin mango daraxti ekiladi.
Ushbu tashabbus qishloq xo‘jaligi sohasidagi zamonaviy texnologiyalarni jalb etish hamda hududning eksport salohiyatini oshirishga xizmat qiladi. Mane o‘zining ushbu ijtimoiy-iqtisodiy loyihasi orqali ona yurtining infratuzilmasini yaxshilash va aholi turmush darajasini ko‘tarishni maqsad qilgan.
Izohlar
0