Yaqin Sharq mintaqasidagi muhim strategik ahamiyatga ega bo‘lgan savdo va dengiz yo‘laklari – O‘mon ko‘rfazi hamda Hurmuz bo‘g‘ozida yakshanbaga o‘tar kechasi qator favqulodda vaziyatlar kuzatildi. Bu haqda Zamin.uz xabar berdi.
Reuters agentligining Birlashgan Arab Amirliklari rasmiy idoralariga tayanib tarqatgan ma’lumotlariga ko‘ra, mazkur hududda yuk kemalaridan biri to‘satdan yonib ketgan. Voqea joyiga yetib borgan Birlashgan Arab Amirliklari Milliy gvardiyasi xodimlari tezkor qutqaruv amaliyotini tashkil etishdi.
Natijada, yong‘in domida qolgan kemadagi 22 nafar ekipaj a’zosi o‘z vaqtida qutqarilib, xavfsiz hududga evakuatsiya qilindi. Hozirgi vaqtda tegishli idoralar tomonidan hodisaning kelib chiqish sabablari o‘rganilmoqda.
Mintaqadagi xalqaro yuk tashuvlari va dengiz qatnovi xavfsizligini ta’minlash maqsadida kuzatuv choralari kuchaytirildi. Mazkur hudud dunyo energiya resurslari tranziti uchun o‘ta muhim nuqta hisoblanganligi bois, yuz bergan holat xalqaro hamjamiyat va dengiz yuk tashuvchi kompaniyalar e’tiborini o‘ziga tortdi.
Qutqaruv operatsiyasi yakunlangach, kemadagi yong‘in oqibatlarini bartaraf etish bo‘yicha ishlar davom ettirilmoqda.
Izohlar
0