Qozog‘iston va Qirg‘iziston diplomatik vakolatxonalar uchun yer almashdi

Qozog‘iston Respublikasi parlamenti yuqori palatasi Ostona va Bishkek shaharlarida diplomatik vakolatxonalar hamda elchilarning rasmiy qarorgohlarini joylashtirish uchun yer maydonlari va ko‘chmas mulk obektlarini o‘zaro almashish to‘g‘risidagi hukumatlararo bitimni ratifikatsiya qildi. Bu haqda Zamin.uz xabar berdi.

Tengrinews nashrining xabar berishicha, ushbu hujjat har ikki davlatga tegishli hududlardan 49 yil muddatga bepul foydalanish huquqini taqdim etadi. Kelishuvning asosiy maqsadi diplomatik missiyalarning samarali faoliyat yuritishi uchun zarur bo‘lgan infratuzilmani shakllantirish va ikki tomonlama hamkorlikni yanada mustahkamlashdan iborat.

Mazkur bitim doirasida Qozog‘iston va Qirg‘iziston tomonlari elchixona binolari hamda xizmat uylari uchun mo‘ljallangan yer uchastkalarini o‘zaro taqdim etish majburiyatini olgan. Ushbu tashabbus ikki mamlakat o‘rtasidagi diplomatik aloqalarni yangi bosqichga olib chiqish hamda xalqaro munosabatlar doirasida o‘zaro manfaatli sheriklikni huquqiy jihatdan tartibga solishga xizmat qiladi.

Hujjat rasman tasdiqlanganidan so‘ng, tegishli davlat idoralari kelishuv shartlarini amaliyotga tatbiq etish jarayonini boshlaydi.