Vladimir Putin rasmiy tashrif bilan Qozog‘iston poytaxtiga yetib keldi

Markaziy Osiyo mintaqasi siyosiy va diplomatik aloqalar nuqtai nazaridan faol davrni boshdan kechirmoqda. Bu haqda Zamin.uz xabar berdi.

Rossiya Federatsiyasi Prezidenti Vladimir Putin rasmiy davlat tashrifi bilan Qozog‘iston poytaxti Ostona shahriga yetib keldi. Uch kunlik mazkur safar doirasida ikki tomonlama munosabatlarni mustahkamlash bilan birga, Oliy Yevroosiyo iqtisodiy kengashi sammiti ham o‘tkazilishi belgilangan.

Rossiya delegatsiyasi rahbarini olib kelgan Il-96 samolyoti Qozog‘iston havo hududiga kirishi bilan mamlakat Harbiy-havo kuchlariga qarashli ikkita qiruvchi samolyot hamrohligida kuzatib borildi. Aeroportda oliy martabali mehmonni Qozog‘iston Prezidenti Qosim-Jo‘mart To‘qayev kutib oldi.

Rasmiy muzokaralar ertasi kunga belgilangan bo‘lsa-da, ikki davlat rahbarlari aeroportdan to‘g‘ridan-to‘g‘ri Kedr uyi qarorgohiga yo‘l olishdi. Bu yerda o‘tkazilgan norasmiy muloqot chog‘ida tomonlar tashrifning asosiy kun tartibi va bo‘lajak sammit masalalarini muhokama qilib olishdi.

Tashrifning ikkinchi kuni ikki formatdagi muzokaralar bilan davom etadi. Tomonlar siyosiy, iqtisodiy, harbiy-texnik va gumanitar yo‘nalishlardagi hamkorlikni rivojlantirishga e’tibor qaratishadi.

Xususan, Rossiya neftini Qozog‘iston hududi orqali tranzit qilish hajmini oshirish hamda Rosatom korporatsiyasi ko‘magida Qozog‘istonda AES qurish loyihasini moliyalashtirish masalalari kun tartibining markaziy qismidan joy olgan. Yakunda 16 ta xalqaro hujjat, jumladan, ikki xalq do‘stligi va yaxshi qo‘shnichiligining yetti asosi to‘g‘risidagi qo‘shma bayonot imzolanishi kutilmoqda.

Shuningdek, dasturdan Amur yo‘lbarslariga bag‘ishlangan taqdimot, Sirius ta’lim maskani poydevoriga kapsula qo‘yish va Abadiy do‘stlik xiyobonida daraxt ekish kabi ramziy marosimlar ham o‘rin olgan. Safar so‘ngida Vladimir Putin Yevroosiyo iqtisodiy forumida ishtirok etadi.

Oliy Yevroosiyo iqtisodiy kengashining yakuniy yig‘ilishida esa Armanistonning Yevropa Ittifoqi bilan bog‘liq rejalari va mintaqaviy integratsiya istiqbollari muhokama qilinishi rejalashtirilgan.