Kaka Real Madriddagi faoliyati nima uchun omadsiz bo‘lganini tushuntirdi

Braziliyalik afsonaviy futbolchi Kaka Real Madrid klubidagi toʻrt yillik faoliyati davomida boshidan kechirgan murakkab damlar xususida ochiq fikr bildirdi. Bu haqda Zamin.uz xabar berdi.

"Oltin toʻp" sohibi boʻlgan ushbu yulduz 2009-yilda Santiago Bernabeu stadioniga katta umidlar bilan tashrif buyurgan edi. Biroq Milan safida namoyish etgan yorqin va dunyo darajasidagi oʻyinini Ispaniya poytaxtida takrorlash unga nasib qilmadi.

Madrid klubiga oʻtgan davrida u koʻplab qiyinchiliklarga duch keldi. Kakaning Ispaniyadagi faoliyati kutilganidek muvaffaqiyatli kechmadi va u jamoa tarkibida sovrinlar yutishdan koʻra, koʻproq jarohatlar hamda murabbiylar bilan yuzaga kelgan tushunmovchiliklar sababli koʻp vaqtini maydon tashqarisida oʻtkazishga majbur boʻldi.

Futbolchining soʻzlariga koʻra, bu davr uning professional hayotidagi eng ogʻir bosqichlardan biri sifatida xotirasida qolgan. Kaka oʻzining Real Madrid safidagi faoliyati davomida jismoniy holatini barqaror saqlay olmagani va doimiy ravishda sogʻligʻidagi muammolar bilan kurashganini taʼkidlab oʻtdi.

Natijada futbolchi oʻz salohiyatini toʻliq ochib bera olmaganidan afsusda ekanini yashirmadi.