Inter Kristian Kivu bilan shartnomani 2028 yilgacha uzaytirdi

Milanning "Inter" klubi ruminiyalik murabbiy Kristian Kivu bilan amaldagi shartnomani uzaytirilganini rasman e’lon qildi. Bu haqda Euro-football.ru xabar berdi.

Mutaxassis o‘tgan yildan buyon jamoani boshqarib kelmoqda va qisqa vaqt ichida klub rahbariyatining to‘liq ishonchini qozonishga muvaffaq bo‘ldi. Kivu qo‘l ostida "neradzurrilar" nafaqat Italiya chempionatida, balki mamlakat kubogida ham zafar quchib, o‘z kolleksiyasini muhim sovrinlar bilan boyitdi.

Eslatib o‘tamiz, Kristian Kivu futbolchilik faoliyati davomida ham "Inter" sharafini himoya qilgan. 2007-yildan 2014-yilga qadar davom etgan bu davrda u bir necha bor Italiya chempioni unvoniga sazovor bo‘lgan.

Murabbiylik faoliyati borasida esa u "Parma" klubidagi samarali ishi bilan tanilgan. Aynan Kivu boshchiligida parmaliklar Italiya futbolining elita divizioniga qaytishga muvaffaq bo‘lishgandi.

Klub matbuot xizmati xabariga ko‘ra, yangi kelishuv ikki yilga mo‘ljallangan bo‘lib, u 2028-yilning yoziga qadar amal qiladi. Rahbariyat murabbiy bilan hamkorlikni davom ettirish orqali jamoaning barqaror rivojlanishini ta’minlashni maqsad qilgan.

Kelgusi mavsumlarda ham "Inter" o‘z oldiga eng yuqori maqsadlarni qo‘yishi va Kivu rahbarligida yangi muvaffaqiyatlarga erishishi kutilyapti.