O‘zbekiston Prezidenti Administratsiyasi rahbari Saida Mirziyoyeva Amerika Qo‘shma Shtatlariga tashrifi doirasida Jahon savdo tashkiloti bosh direktori Ngozi Okonjo-Iveala bilan muzokaralar o‘tkazdi. Bu haqda Zamin.uz xabar berdi.
Tomonlar O‘zbekistonning mazkur nufuzli xalqaro tuzilmaga kirish jarayonidagi bugungi holatni va yaqin kelajakda amalga oshirilishi lozim bo‘lgan muhim vazifalarni atroflicha tahlil qildilar. Saida Mirziyoyeva o‘zining ijtimoiy tarmoqdagi sahifasi orqali ushbu uchrashuv tafsilotlari bilan o‘rtoqlashdi.
U o‘z chiqishida O‘zbekistonning JSTga a’zo bo‘lish yo‘lidagi sa’y-harakatlarini qo‘llab-quvvatlayotgani hamda ko‘rsatayotgan doimiy ko‘magi uchun Ngozi Okonjo-Ivealaga minnatdorlik bildirdi. Muzokaralar davomida ikki tomonlama hamkorlikni yanada mustahkamlash va mamlakatning tashqi savdo siyosatini xalqaro standartlarga moslashtirish masalalariga alohida e’tibor qaratildi.
Mazkur muloqot O‘zbekistonning jahon iqtisodiy makoniga integratsiyalashuv jarayonida muhim qadam bo‘lib xizmat qiladi. O‘z navbatida, JST rahbariyati O‘zbekistonda olib borilayotgan keng ko‘lamli islohotlarni yuqori baholab, tashkilotga a’zo bo‘lish jarayonini tezlashtirish borasida zarur texnik yordam ko‘rsatishga tayyorligini tasdiqladi.
Izohlar
0