O‘zbekistonliklar may oyida necha kun dam oladi

O'zbekistonda may oyidagi bayramlar munosabati bilan ketma-ket dam olish kunlari e'lon qilindi

O'zbekiston aholisi 2026 yilning may oyida Xotira va qadrlash kuni hamda Qurbon hayiti munosabati bilan bir necha kun uzluksiz hordiq chiqarish imkoniyatiga ega bo'ladi. Bu haqda Zamin.uz xabar berdi.

Prezident farmoni bilan tasdiqlangan dam olish kunlarini ko'chirish tartibiga ko'ra, bayram sanalari atrofida qo'shimcha ishlanmaydigan kunlar belgilangan. Xususan, 9 may shanba kuniga to'g'ri kelishi sababli, ushbu dam olish kuni 11 may dushanba kuniga ko'chirildi.

Natijada haftasiga 5 kun ishlaydigan fuqarolar 9, 10 va 11 may kunlari ketma-ket 3 kun dam oladi. 6 kunlik ish haftasida band bo'lganlar uchun esa dam olish muddati 2 kunni tashkil etadi.

Shuningdek, may oyining yakunida Qurbon hayiti munosabati bilan uzoq muddatli hordiq davri kutilmoqda. Farmonga muvofiq, ish haftasining turidan qat'i nazar, barcha xodimlar uchun 28 may payshanba va 29 may juma kunlari qo'shimcha dam olish kunlari etib belgilandi.

6 kunlik ish tartibida ishlovchilar uchun 30 may shanba kuni ham dam olish kuni hisoblanadi. Agar Qurbon hayiti bayrami 27 may sanasiga to'g'ri kelsa, yakshanba kunini ham inobatga olgan holda, o'zbekistonliklar 27 maydan 31 mayga qadar ketma-ket 5 kun davomida dam olishlari mumkin bo'ladi.