Mirziyoyev Samarqandda Osiyo taraqqiyot banki delegatsiyasini qabul qildi

Mirziyoyev Samarqandda Osiyo taraqqiyot banki delegatsiyasi bilan uchrashdi

Prezident Shavkat Mirziyoyev Samarqand shahriga tashrifi doirasida Osiyo taraqqiyot banki (OTB) prezidenti Masato Kanda boshchiligidagi delegatsiyani qabul qildi. Bu haqda Zamin.uz xabar berdi.

Muzokaralar davomida O'zbekiston va xalqaro moliya instituti o'rtasidagi strategik sheriklikni kengaytirish masalalari ko'rib chiqildi. Kanda O'zbekiston yetakchisiga bank Boshqaruvchilar kengashining 59-yillik yig'ilishini Samarqandda o'tkazish tashabbusini qo'llab-quvvatlagani uchun minnatdorlik bildirdi.

Tomonlar o'tgan 30 yillik hamkorlik natijalarini yuqori baholadilar. Hozirgi kunda amalga oshirilayotgan loyihalar portfeli 16 mlrd dollarga yetgan bo'lib, O'zbekiston bankning Markaziy Osiyodagi eng yirik hamkoriga aylandi.

Hamkorlik doirasida energetika, transport infratuzilmasi, suv ta'minoti va qishloq xo'jaligini modernizatsiya qilish bo'yicha muhim ishlar bajarilgani qayd etildi. Uchrashuvda 2030 yilgacha mo'ljallangan yangi sheriklik dasturi muhokama qilindi.

Mazkur reja doirasida umumiy qiymati 12,5 mlrd dollarlik loyihalarni amalga oshirish belgilangan. Hamkorlikning ustuvor yo'nalishlari sifatida xususiy sektorni qo'llab-quvvatlash, kambag'allikni qisqartirish, inklyuziv ta'lim va raqamli innovatsiyalarni joriy etish belgilab olindi.

Muzokaralar yakunida 2030 yilgacha mo'ljallangan hamkorlik dasturini almashish marosimi o'tkazildi. Ma'lumot uchun, OTB Boshqaruvchilar kengashining yillik yig'ilishi Samarqandda 3-6 may kunlari bo'lib o'tmoqda.