Jeki Chan Qozog‘istonda yangi filmining suratga olish ishlarini boshladi

Mashhur aktyor va rejissyor, jangovar filmlar ustasi Jeki Chan o‘zining mashhur “G‘aroyib aslahalar” film franshizasini davom ettirishga kirishdi. Bu haqda Zamin.uz xabar berdi.

Loyihaning to‘rtinchi qismini suratga olish ishlari qo‘shni Qozog‘iston hududida boshlab yuborildi. Ijodiy guruh ushbu hududda keng ko‘lamli tasvirga olish jarayonlarini amalga oshirishni rejalashtirgan.

Ma’lum bo‘lishicha, Jeki Chan mazkur qarorga kelishdan avval jiddiy tayyorgarlik ko‘rgan. 2025 yilda Olmaotaga maxsus tashrif buyurgan taniqli kinoijodkor bo‘lajak suratga olish maydonlarini shaxsan ko‘zdan kechirib chiqqan.

U hududdagi tabiat manzaralari va arxitektura obidalari bilan yaqindan tanishib, o‘zining talablariga mos keladigan lokatsiyalarni tanlab olgan. “G‘aroyib aslahalar” kinokartinasining navbatdagi qismi ham tomoshabinlarda katta qiziqish uyg‘otishi kutilmoqda.

Hozirda suratga olish jarayonlari belgilangan grafik asosida davom etmoqda va texnik guruh barcha zaruriy jihozlarni joylashtirish ishlarini yakunlash arafasida. Loyiha nafaqat aktyorning ijodiy faoliyatida, balki mintaqadagi kinoindustriya rivojida ham muhim ahamiyat kasb etadi.