Toshkent shahrida aholi va poytaxt mehmonlari uchun qulaylik yaratish maqsadida infratuzilmani yaxshilash ishlari olib borilmoqda. Bu haqda Zamin.uz xabar berdi.
Xususan, shahar hududidagi 12 ta tumanda jami 100 ta zamonaviy jamoat hojatxonalarini barpo etish ko‘zda tutilgan. Ushbu obyektlarning aniq joylashuv manzillari belgilab olinib, tegishli ro‘yxat tasdiqlandi.
Mazkur chora-tadbirlar xalq deputatlari Toshkent shahar Kengashining 23 oktyabr kuni qabul qilingan qaroriga muvofiq amalga oshirilmoqda. Yangi sanitariya-gigiyena shoxobchalarini tashkil etish jarayonida davlat-xususiy sheriklik mexanizmidan samarali foydalanish rejalashtirilgan.
Bunda loyihalarni amalga oshirish jarayoni soddalashtirilgan tartibda o‘tkazilishi nazarda tutilgan. Bunday yondashuv shahar infratuzilmasini qisqa muddatlarda sifatli tarzda boyitish hamda aholi punktlarida zarur gigiyena sharoitlarini yaxshilashga xizmat qiladi.
Ayni damda loyihalar uchun ajratilgan hududlarda tayyorgarlik va qurilish ishlarini tashkil etish bo‘yicha tegishli mas’ullar o‘z ishlarini davom ettirmoqda. Ushbu tashabbus poytaxtning shaharsozlik madaniyatini yuksaltirish va fuqarolar uchun qulay muhitni ta’minlashdagi muhim qadam sifatida baholanmoqda.
Izohlar
0