Amerikaning Tesla kompaniyasi o‘zining o‘ziga xos dizayni bilan ajralib turuvchi Cybertruck elektropikapini ishlab chiqarish jarayonini 2027 yilning o‘rtalariga kelib to‘xtatishni rejalashtirmoqda. Bu haqda Zamin.uz xabar berdi.
Mazkur qaror haqida kompaniya rahbari Ilon Mask rasman ma’lum qildi. Uning so‘zlariga ko‘ra, Texasdagi Gigafactory zavodida ushbu modelni yig‘ish ishlari bosqichma-bosqich qisqartirib boriladi.
Ishlab chiqarish hajmining kamayishi natijasida bo‘shaydigan quvvatlar kompaniyaning kelajakdagi strategik maqsadlariga, xususan, haydovchisiz harakatlanadigan transport vositalarini yaratish va ularni ommaviy ishlab chiqarishga yo‘naltiriladi. Tesla rahbariyati ushbu o‘zgarishlar kompaniyaning texnologik rivojlanish yo‘nalishini yangi bosqichga olib chiqishini ta’kidlamoqda.
Cybertruck ishlab chiqarilishining yakunlanishi zavod infratuzilmasini yanada zamonaviy va avtonom tizimlar talablariga moslashtirish imkonini beradi. Ayni damda kompaniya mutaxassislari ishlab chiqarish liniyalarini qayta jihozlash bo‘yicha tayyorgarlik ishlarini boshlab yuborgan.
Bu jarayon avtomobilsozlik sanoatida Tesla kompaniyasining elektrotexnologiyalar sohasidagi ustuvorligini saqlab qolishga qaratilgan muhim qadam sifatida baholanmoqda.
Izohlar
0