Saida Mirziyoyeva Toshkent teatrlari va madaniyat maskanlarini ko‘zdan kechirdi

Saida Mirziyoyeva Toshkent teatrlaridagi muammolarni o'rgandi

Prezident administratsiyasi rahbari Saida Mirziyoyeva poytaxtdagi madaniy muassasalar faoliyati bilan tanishish maqsadida Toshkent teatrlari va madaniyat maskanlariga tashrif buyurdi. Bu haqda Zamin.uz xabar berdi.

O'rganishlar davomida sohadagi mavjud yutuqlar bilan birga, uzoq vaqtdan buyon hal etilmayotgan tizimli kamchiliklar ham ko'rib chiqildi. Mirziyoyeva o'zining rasmiy Telegram-kanalida poytaxt teatrlari azaldan ijodiy hayot markazi bo'lib kelganini, biroq hozirda ko'plab binolarning moddiy-texnik holati talabga javob bermasligini ta'kidladi.

Tashrif davomida Muqimiy nomidagi o'zbek davlat musiqiy teatri, O'zbekiston Yoshlar teatri hamda "Arena" yotoqxonasi binolari ko'zdan kechirildi. Mazkur inshootlarning barchasi anchadan buyon jiddiy kapital ta'mirga muhtoj ekani aniqlandi.

Saida Mirziyoyeva: "Poytaxtdagi uchta teatrni ko'zdan kechirdik. Muqimiy nomidagi akademik teatr, Yoshlar teatri hamda 'Arena' yotoqxonasi binolari anchadan buyon jiddiy ta'mirtalab holatda", — deya vaziyatga baho berdi.

Administratsiya rahbarining qayd etishicha, teatrlarda munosib sharoitlar yaratilishi ijodiy muhitning jonlanishiga bevosita xizmat qiladi. Bu esa o'z navbatida repertuarlar yangilanishi, zamonaviy hamda dolzarb mavzulardagi spektakllar soni ortishi va tomoshabinlar oqimining ko'payishiga zamin yaratadi.

Mirziyoyeva sharoitlar yaxshilansagina, sahna asarlari xalq ko'nglidan joy olishini bildirib o'tdi. Shuningdek, madaniy merosni saqlash yo'nalishida ham ishlar olib borilmoqda.

Xususan, Alisher Navoiy nomidagi Davlat adabiyot muzeyida saqlanayotgan nodir qo'lyozmalarni raqamlashtirish jarayoni ko'zdan kechirildi. Mirziyoyeva binolarni ta'mirlash va moliyalashtirish bilan bog'liq masalalarni hal etish uchun mas'ul shaxslar tayinlanganini, mazkur jarayonni shaxsan o'z nazoratiga olganini ma'lum qildi.

Madaniyat sohasidagi islohotlar moddiy bazani mustahkamlash orqali yangi bosqichga ko'tarilishi kutilmoqda.