Rossiya kosmonavtlari 2027-yildan VR-trenajyorlarda tayyorgarlik ko'rishni boshlaydi

Rossiya yangi orbital stansiya uchun zamonaviy kosmik trenajyor ishlab chiqmoqda

Rossiyada yangi orbital stansiya (ROS) ekipajlarini tayyorlashga mo'ljallangan zamonaviy kosmik trenajyor yaratilmoqda. Bu haqda Zamin.uz xabar berdi.

Loyihani 2027 yil yakuniga qadar yakunlash belgilangan bo'lib, qurilma to'liq mahalliy texnologiyalar asosida barpo etiladi. Bu haqda Ixbt.com nashri xabar berdi.

Tizimni Rossiya Fanlar akademiyasi Sibir bo'limining Avtomatika va elektrometriya instituti mutaxassislari «Softlab-Nsk» kompaniyasi bilan hamkorlikda tayyorlamoqda. Loyiha doirasida parvoz holatlari va boshqaruv jarayonlarini aniq modellashtirish maqsadida virtual borliq (VR) texnologiyalaridan foydalanilmoqda.

Muhandislarning qayd etishicha, mazkur majmua Xalqaro kosmik stansiya (XKS) missiyalarida qo'llanilgan avvalgi trenajyorlardan texnik ko'rsatkichlari bo'yicha sezilarli darajada ustun turadi. Yangi tizim yanada mukammal grafika hamda o'ziga xos arxitekturaga ega bo'lib, 50 Gs chastotada ishlashi ko'zda tutilgan.

Rejaga ko'ra, barcha butlovchi qismlar Rossiya hududida ishlab chiqariladi va bu xorijiy texnologiyalarga bo'lgan bog'liqlikni bartaraf etadi. Rossiya orbital stansiyasini to'liq foydalanishga topshirish esa 2034 yilga mo'ljallangan.