O‘zbekistonlik yosh muhandislar jamoasi havo hududiga noqonuniy kirib kelgan uchuvchisiz apparatlarni zararsizlantirishga qaratilgan innovatsion texnologiyani taqdim etdi. Bu haqda Zamin.uz xabar berdi.
Kelajak muhandislari loyihasi doirasida jamoatchilikka ko‘rsatilgan Shunqor-88 nomli dron-tutuvchi qurilma o‘zining texnik imkoniyatlari hamda iqtisodiy samaradorligi bilan mutaxassislar e’tiborini tortmoqda. Mazkur ishlanmaning ishlab chiqarish tannarxi xalqaro bozordagi analoglariga nisbatan sezilarli darajada arzonligi uning raqobatbardoshligini oshiruvchi asosiy omil sifatida baholanmoqda.
Taqdimot jarayonida keltirilgan ma’lumotlarga tayanadigan bo‘lsak, ushbu qurilma yuqori tezlikda harakatlanuvchi nishonlarni aniqlash va ularni tutib olish qobiliyatiga ega. Xususan, Shunqor-88 soatiga 450 kilometrgacha bo‘lgan tezlikda parvoz qilayotgan ob’ektlarni kuzatib borish va ularga qarshi samarali choralar ko‘rish imkoniyatiga ega.
Loyiha mualliflarining ta’kidlashicha, ushbu qurilma nafaqat harbiy maqsadlarda, balki muhim infratuzilma ob’ektlarini himoya qilishda ham muhim ahamiyat kasb etadi. Hozirgi kunda muhandislar qurilmaning dasturiy ta’minotini yanada takomillashtirish va uning amaliyotdagi samaradorligini oshirish ustida ish olib bormoqda.
Mazkur ishlanma mahalliy mudofaa sanoati salohiyatini yuksaltirish yo‘lida tashlangan muhim qadamlardan biri hisoblanadi.
Izohlar
0