Toshkent viloyatining Ohangaron shahrida mudhish voqea yuz berdi. Bu haqda Zamin.uz xabar berdi.
Shahardagi 6-sonli davlat maktabgacha ta’lim tashkilotida tarbiyalanayotgan uch yoshli bola kimyoviy moddadan zaharlanib vafot etdi. Mazkur fojiali holat 28 avgust kuni qayd etilgan.
Bosh prokuratura matbuot kotibi Hayot Shamsutdinovning ma’lum qilishicha, voqea joyida tergovga qadar tekshiruv harakatlari olib borilmoqda. Dastlabki surishtiruv jarayonida aniqlanishicha, 27 avgust kuni bog‘chada xo‘jalik ishlari olib borilgan.
Shu jarayonda hasharotlarga qarshi kurashish uchun mo‘ljallangan kimyoviy vositadan foydalanilgan. Ehtiyotsizlik oqibatida kichik yoshdagi bola ushbu zaharli suyuqlikni ichib yuborgan va shifoxonaga yetkazilganiga qaramay, u vafot etgan.
Ayni damda huquqni muhofaza qiluvchi organlar hodisaning barcha tafsilotlarini o‘rganmoqda va tegishli ekspertizalar tayinlangan. Tekshiruv natijalari bo‘yicha qonuniy qaror qabul qilinishi ta’minlanadi.
Mazkur holat maktabgacha ta’lim muassasalarida xavfsizlik qoidalariga rioya etish masalasini yana bir bor dolzarb qilib qo‘ydi.
Izohlar
0