Toshkent shahrining Sergeli tumanida huquqni muhofaza qiluvchi organlar xodimlari tomonidan giyohvand moddalarning noqonuniy aylanmasiga aloqador shaxslar qo‘lga olindi. Bu haqda Zamin.uz xabar berdi.
Tergov jarayonida ma’lum bo‘lishicha, jinoyat sodir etishda gumon qilinayotgan er-xotin va ularning sherigi ushbu noqonuniy faoliyatni uyushgan holda amalga oshirib kelgan. Huquq-tartibot idoralari xodimlari tomonidan gumonlanuvchilarning Chilonzor tumanida ijaraga olib yashayotgan xonadoni ko‘zdan kechirilganda, yashirin tarzda saqlangan taqiqlangan moddalar aniqlandi.
Xususan, giyohvandlik vositalari yumshoq o‘yinchoq ayiq ichiga mohirlik bilan yashirilgan holatda topilib, daliliy ashyo sifatida olindi. Dastlabki surishtiruvlarga ko‘ra, mazkur guruh a’zolari o‘zlariga tegishli Matiz rusumli avtomobildan foydalangan holda shahar bo‘ylab harakatlangan.
Ular giyohvand moddalarni turli hududlarga yashirin yo‘llar bilan qoldirish, ya’ni zakladka usuli orqali tarqatish bilan shug‘ullanishgan. Hozirgi vaqtda ushbu shaxslarga nisbatan tegishli moddalar bilan jinoyat ishi qo‘zg‘atilib, tergov harakatlari davom ettirilmoqda.
Mazkur holat bo‘yicha qonuniy choralar ko‘rilishi ta’minlanadi.
Izohlar
0