Namangan xalqaro aeroportida bojxona nazorati jarayonida qonunbuzarlik holati aniqlandi. Bu haqda Zamin.uz xabar berdi.
Hindistonga parvoz qilishi rejalashtirilgan yo‘lovchining yuklari ko‘zdan kechirilganda, belgilangan tartibda deklaratsiyalanmagan qimmatbaho buyumlar topilgan. Bojxona qo‘mitasi ma’lumotlariga ko‘ra, umumiy qiymati 108,5 million so‘mni tashkil etuvchi oltin va zargarlik buyumlari yashirin yo‘l bilan olib chiqib ketilmoqchi bo‘lgan.
Tekshiruv davomida huquqbuzar shaxs qimmatbaho taqinchoqlarni oshkora qilmaslik maqsadida ularni oziq-ovqat mahsulotlari orasiga joylashtirgani ma’lum bo‘ldi. Xususan, oltin buyumlar mayiz va yong‘oq aralashmasi solingan paketlarga ehtiyotkorlik bilan yashirilgan.
Mazkur holat Namangan aeroporti chegara bojxona posti xodimlari hamda DXX Aviatsiya xavfsizligi xizmati vakillari tomonidan hamkorlikda fosh etilgan. Hozirgi vaqtda ushbu voqea yuzasidan tegishli tartibda surishtiruv harakatlari olib borilmoqda.
Bojxona organlari mamlakatimiz hududidan qimmatbaho metallarni noqonuniy olib chiqish urinishlariga qarshi nazoratni kuchaytirganini ta’kidlamoqda.
Izohlar
0