Cloudflare Rossiyaning «Max» ilovasini josuslik dasturi deb topdi

Cloudflare xosting-provayderi VK kompaniyasiga tegishli "Max" milliy messenjerining max.ru domenini ayg'oqchi dasturlar ro'yxatiga kiritdi. Bu haqda Zamin.uz xabar berdi.

Ixbt.com nashrining yozishicha, xizmat ushbu manzilni xavfli deb hisoblamoqda. Avvalroq provayder "Telega" ilovasi bo'yicha ham shunday qaror qabul qilgan va natijada ushbu dastur App Store platformasidan olib tashlangan edi.

Hozirgi vaqtda max.ru resursi haqiqiy TLS sertifikatiga ega bo'lib, messenjerning o'zi App Store va Google Play do'konlarida faoliyatini davom ettirmoqda. "Max" — VK tomonidan yaratilgan ko'p funksiyali aloqa vositasi bo'lib, u matnli xabarlar, video va audio qo'ng'iroqlardan tashqari, moliyaviy o'tkazmalar hamda foydalanuvchi yoshini tasdiqlash kabi imkoniyatlarni taqdim etadi.

2026 yil 21 aprel kuni ilova nomi "MAKS" deb qayta nomlandi. VK rahbariyati ushbu o'zgarishni loyihaning maksimal imkoniyatlarini namoyish etish istagi bilan izohladi.

Messenjerni rivojlantirish doirasida 2026 yil 25 aprel kuni tizimga yangi funksiyalar, jumladan, sharhlar yozish, so'rovnomalar o'tkazish va tarixlar (stories) joylash imkoniyati qo'shildi. Shuningdek, 27 aprel sanasidan boshlab ilova orqali 100 mingdan ziyod savdo shoxobchalarida mijozlarning yoshini masofaviy tasdiqlash tizimi rasman ish boshladi.