Oculus asoschilari yangi Sesame suniy intellekt ilovasini taqdim etdi

Meta kompaniyasiga sotilgan Oculus asoschilari tomonidan tashkil etilgan Sesame startapi oʻzining yangi iOS ilovasini foydalanuvchilar eʼtiboriga havola etdi. Bu haqda Zamin.uz xabar berdi.

Bir yildan ortiq vaqt mobaynida ustida ish olib borilgan ushbu loyiha ChatGPT kabi anʼanaviy chatbotlardan tubdan farq qiladi. Tizim foydalanuvchi bilan tabiiy muloqotga kirisha oladigan sunʼiy intellekt agentlari tajribasini taqdim etadi.

Techcrunch.com manbasiga koʻra, mazkur texnologiyaning asosiy ustunligi maʼlumotni izlash va javob qaytarish jarayonini insoniy nutq ohangiga maksimal darajada yaqinlashtirilganida namoyon boʻladi. Sesame tizimi bir vaqtning oʻzida bir nechta parallel qidiruvlarni amalga oshirish imkoniyatiga ega.

Bu texnik yechim sunʼiy intellektga nutq jarayonidayoq yangi maʼlumotlarni qoʻshish yoki oʻz fikrini oʻzgartirish imkonini beradi. Ilova doirasida Maya, Miles, Simone va Charlie kabi toʻrtta alohida agent faoliyat yuritadi.

Ularning har biri oʻziga xos ovoz, xarakter va xotira tizimiga ega. Avvalgi sinov bosqichlarida ushbu agentlar bilan milliondan ortiq inson muloqot qilgan.

Ilova vizual maʼlumotlar uchun qidiruv kartalari, eslatmalar rejimi hamda maxfiy suhbatlar uchun inkognito funksiyasi bilan boyitilgan. Ovozli muloqot imkoni boʻlmagan vaziyatlar uchun esa matnli rejim koʻzda tutilgan.

Startap yaqinda Sequoia jamgʻarmasi kabi yirik investorlardan 250 million dollar miqdorida mablagʻ jalb qildi. Kompaniya kelajak rejalari doirasida 2027-yilda aqlli koʻzoynaklar ishlab chiqarishni maqsad qilgan.

Kelgusida agentlar foydalanuvchi nomidan muayyan harakatlarni bajarishi kutilmoqda. Hozirda iOS ilovasi 39 ta davlatda bepul foydalanish uchun ochiq, biroq roʻyxatdan oʻtishda navbat kutish tartibi amal qiladi.

Android tizimi uchun ilova keyinroq taqdim etilishi rejalashtirilgan.