Meta suniy intellektga asoslangan yangi taqiladigan qurilma ishlab chiqmoqda

Meta kompaniyasi suniy intellekt texnologiyalari bilan jihozlangan yangi turdagi taqiladigan qurilmani ishlab chiqish jarayonini boshladi. Bu haqda Zamin.uz xabar berdi.

The Information nashri tomonidan eʼlon qilingan maʼlumotlarga koʻra, ushbu gadjet boʻyinga osib yuriladigan maxsus tumor koʻrinishida boʻlib, foydalanuvchilarning kundalik muloqotlarini qayd etish va ularni tahlil qilish imkoniyatiga ega boʻladi. Loyiha asosida Meta tomonidan 2025-yil oxirida sotib olingan Limitless startapining texnologik ishlanmalari yotadi.

Mazkur kompaniya aynan kiyimga taqiladigan va suhbatlarni yozib oluvchi aqlli moslamalarni yaratishga ixtisoslashgan edi. Meta vakillarining qayd etishicha, mazkur xarid suniy intellektga asoslangan taqiladigan texnologiyalar yaratish jarayonini sezilarli darajada tezlashtirishga xizmat qiladi.

Garchi oʻtmishda bozorga chiqarilgan shunga oʻxshash AI-gadjetlar foydalanuvchilar orasida kutilganidek ommalashmagan boʻlsa-da, bunga maxfiylik bilan bogʻliq xavotirlar hamda marketing yoʻnalishidagi kamchiliklar sabab boʻlgani aytiladi. Shunga qaramay, soha gigantlari ushbu yoʻnalishni rivojlantirishdan voz kechishmayapti.

Bundan tashqari, Meta oʻzining aqlli koʻzoynaklar turkumini kengaytirishni va Wearables for Work deb nomlangan biznes-obuna xizmatini yoʻlga qoʻyishni rejalashtirmoqda. Ushbu tashabbuslar orqali kompaniya joriy yilning birinchi choragida 4 milliard dollar zarar koʻrgan Reality Labs boʻlinmasining moliyaviy barqarorligini taʼminlash va koʻrsatkichlarni yaxshilashni maqsad qilgan.

Techcrunch.com manbasiga koʻra, mazkur qurilmalarning sinov muddatlari kelasi yilga belgilangan.