Germaniya, Ispaniya va mahalliy sanoat vakillari hamkorligida atrof-muhitni muhofaza qilish borasida muhim ilmiy yutuqqa erishildi. Bu haqda Zamin.uz xabar berdi.
Dresden-Rossendorf Gelmgolts markazi, Granada universiteti hamda Wismut GmbH kompaniyasi mutaxassislari suv tarkibidagi zaharli uranni zararsizlantirishning yangi usulini ishlab chiqishdi. Tadqiqot natijalariga ko‘ra, olimlar muayyan mikroorganizmlar yordamida suvda erigan uranni barqaror kimyoviy birikmaga aylantirishga muvaffaq bo‘lishdi.
Ixbt.com nashri tarqatgan ma’lumotlarga tayangan holda aytish mumkinki, ushbu biotexnologik jarayon suv havzalarini og‘ir metallardan tozalash samaradorligini 96 foizga yetkazish imkonini beradi. Mazkur texnologiya uran qazib olish va qayta ishlash bilan bog‘liq hududlardagi ekologik xavfsizlikni ta’minlashda muhim qadam hisoblanadi.
Mutaxassislar ushbu usulning sanoat miqyosida qo‘llanilishi kelgusida suv resurslarini ifloslanishdan himoya qilish va radiologik xavflarni kamaytirishda katta ahamiyat kasb etishini ta’kidlamoqda. Hozirgi kunda jamoa ushbu jarayonni yanada takomillashtirish va kengaytirish ustida ish olib bormoqda.
Izohlar
0