Olimlar havodagi namlikdan elektr energiyasi olish usulini yaratdi

London Qirolicha Mariya universiteti, Uorik universiteti va Imperial kolleji tadqiqotchilari havodagi namlikdan elektr energiyasi ishlab chiqaruvchi yangi avlod qurilmasini taqdim etdi. Bu haqda Zamin.uz xabar berdi.

Moisture-Electric Generator deb nomlangan ushbu texnologiya oʻzining ekologik tozaligi va biologik parchalanuvchanligi bilan ajralib turadi. Ixbt.com nashrining maʼlum qilishicha, mazkur generator tarkibi jelatin, osh tuzi va faollashtirilgan koʻmir kabi oziq-ovqat mahsulotlaridan iborat boʻlib, inson salomatligi hamda atrof-muhit uchun xavfsiz hisoblanadi.

Anʼanaviy elektron qurilmalarda namlik salbiy omil sanalsa, mazkur ixtiro uni asosiy energiya manbaiga aylantiradi. Qurilmaning uch qatlamli strukturasi namlik taʼsirida ionlarning erkin harakatlanishini taʼminlaydi.

Natijada, bitta modul 30 kundan ortiq muddat davomida 1 volt kuchlanish hosil qilishga qodir. Bir nechta modulni ketma-ket ulash orqali olimlar 90 voltgacha kuchlanish va 5,08 mA tok olishga erishdilar, bu esa 40 ta svetodiodli chiroqni yoritish uchun kifoya qiladi.

Texnologiyaning imkoniyatlari faqat energiya ishlab chiqarish bilan cheklanib qolmaydi. Material oʻta sezgir datchik vazifasini ham oʻtaydi.

Uning namlik oʻzgarishiga sezgirligi nafas olish ritmini kuzatish, nutqni tahlil qilish va kontaktsiz boshqaruv tizimlarini yaratishda keng qoʻllanilishi mumkin. Ayniqsa, tibbiy taqiladigan qurilmalarda ushbu yechim muhim istiqbollarga ega.

Foydalanish muddati tugagach, qurilma tuproqda bir necha hafta ichida parchalanadi yoki suvda erib ketadi. Plastik va ogʻir metallardan xoli boʻlgan ushbu ekologik toza tizim zamonaviy elektronika sohasida aylanma iqtisodiyot tamoyillarini rivojlantirishga xizmat qiladi.