Tramp: «Putin Ukraina bo'yicha murosa qilishni xohlaydi

Tramp: «Putin Ukraina bo'yicha murosa qilishni xohlaydi»

AQSh prezidenti Tramp Rossiya rahbari Putin bilan o'tkazilgan muloqotdan so'ng Ukraina mojarosiga doir o'z qarashlarini bayon etdi. Bu haqda Zamin.uz xabar berdi.

Trampning fikricha, Ukrainadagi vaziyat harbiy nuqtayi nazardan boy berib bo'lingan va endilikda asosiy e'tiborni diplomatik yechimga qaratish lozim. O'z bayonotida Tramp Rossiya yetakchisi ushbu masalada murosaga kelish istagida ekanini va buni ijobiy signal sifatida baholashini ma'lum qildi.

Uning so'zlariga ko'ra, Putinga sulh taklif etilgan va Rossiya tomoni bunga tayyorligini ko'rsatgan. Shuningdek, prezident Rossiya avvalroq ham kelishuvga yaqin bo'lganini, biroq ayrim kuchlar bu jarayonga xalaqit berganini iddao qildi.

Tramp tinchlik muzokaralariga to'sqinlik qilgan tomonlarning ismini ochiqlamadi. AQSh rahbari Ukraina mojarosini hatto Yaqin Sharqdagi ehtimoliy keskinliklardan ham tezroq yakunlash mumkinligiga ishonch bildirdi.

U urushni to'xtatish uchun diplomatiya va muzokaralar yagona to'g'ri yo'l ekanini urg'uladi. Ekspertlar ushbu bayonotlar xalqaro siyosiy maydonda jiddiy muhokamalarga sabab bo'lishini taxmin qilmoqda.