Pekinda yengil samolyot osmono‘par binoga kelib urildi

Xalqaro ommaviy axborot vositalarining xabar berishicha, Pekin shahrida yengil samolyotning osmono‘par bino bilan to‘qnashuvi qayd etildi. Bu haqda Zamin.uz xabar berdi.

Hodisa juma kuni mahalliy vaqt bilan soat 18:00 atrofida ro‘y bergan. Dastlabki ma’lumotlarga ko‘ra, Xitoyda ishlab chiqarilgan, ikki o‘rinli va bir dvigatelli B-12PP rusumli kichik havo kemasi shahar hududidagi eng baland binolardan biri bo‘lgan 109 qavatli inshootga kelib urilgan.

To‘qnashuv oqibatida bino konstruksiyasining ayrim qismlari shikastlanib, ularning bo‘laklari yaqin atrofdagi ko‘chalarga sochilib ketgan. Hozirgi vaqtda voqea joyida tegishli xizmatlar ish olib bormoqda, jabrlanganlar va halokat sabablari yuzasidan aniqlik kiritilmoqda.

Rasmiy idoralar mazkur holat bo‘yicha batafsil tekshiruv jarayonlarini boshlagan. Ushbu favqulodda vaziyat shaharning markaziy qismida qisqa muddatli vahimaga sabab bo‘lgan bo‘lsa-da, vaziyat nazoratga olingan.

Mutaxassislar samolyotning parvoz trayektoriyasi va texnik nosozlik ehtimolini o‘rganishmoqda. Hozircha halok bo‘lganlar yoki jiddiy tan jarohati olganlar haqida aniq ma’lumotlar taqdim etilmagan.