Japarov: Kazinolar faoliyatini tiklash qarori o'zini to'liq oqladi

Japarov Qirg'izistonda kazinolar faoliyatini tiklash qarori samarali bo'lganini ma'lum qildi

Qirg'iziston prezidenti Sadir Japarov mamlakatda kazinolar faoliyatiga ruxsat berish to'g'risidagi qaror o'zini to'liq oqlaganini ta'kidladi. Bu haqda Zamin.uz xabar berdi.

Bu haqda "24.kg" nashri xabar berdi. Davlat rahbarining qayd etishicha, bundan 4 yil muqaddam ushbu tashabbus jamoatchilik o'rtasida jiddiy bahs va qarshiliklarga sabab bo'lgan edi.

Shunga qaramay, Jogorku Kenesh tegishli qonunni qabul qilgan. Japarovning so'zlariga ko'ra, mazkur soha bugungi kunda mamlakat iqtisodiyoti rivojiga ijobiy hissa qo'shmoqda.

Prezident ilgari bildirilgan xavotirlar, xususan, mahalliy aholining qimor o'yinlariga ruju qo'yishi haqidagi taxminlar o'zini ko'rsatmaganini bildirdi. Kazinolar asosan xorijlik sayyohlar va badavlat mijozlarga xizmat ko'rsatmoqda, bu esa mahalliy fuqarolarning zarar ko'rishini cheklagan.

Ushbu tizimning joriy etilishi yangi ish o'rinlari yaratilishi va turizm tarmog'ining kengayishiga xizmat qildi. Davlat rahbari ilgari xorijda mehnat qilgan ko'plab qirg'izistonliklar endi vatanga qaytib, aynan shu sohada ishlayotganini ijobiy natija sifatida e'tirof etdi.

Japarovning hisobiga ko'ra, loyihaning eng asosiy yutug'i davlat byudjetiga qo'shimcha mablag'lar tushishi va iqtisodiy barqarorlikning ta'minlanishidir.