Nepal turizm sohasida yirik firibgarlik: 32 kishi sug'urta mablag'larini o'zlashtirishda gumonlanmoqda
Nepalda huquqni muhofaza qilish organlari Himolay turizmi tarixidagi eng yirik moliyaviy jinoyatlardan birini fosh etdi. Bu haqda Zamin.uz xabar berdi. Gidlar, vertolyot operatorlari va tibbiyot xodimlaridan iborat 32 kishilik guruh katta miqdordagi sug'urta mablag'larini noqonuniy o'zlashtirganlikda ayblanmoqda. Markaziy tergov byurosi ma'lumotlariga ko'ra, jinoiy sxema 2022–2025 yillar davomida asosan Everest va boshqa mashhur trekking yo'nalishlarida amalga oshirilgan.
Mazkur davr mobaynida 4 800 nafarga yaqin xorijiy sayyoh firibgarlik qurboniga aylangani aniqlangan. Tergov xulosalariga ko'ra, jinoyatchilar yuqori qiymatli sug'urta polisiga ega bo'lgan, ayniqsa vertolyot orqali evakuatsiya xizmati kafolatlangan turistlarni nishonga olgan.
Gidlar turli yo'llar bilan sayyohlarning salomatligi yomonlashganidek tasavvur uyg'otishga harakat qilgan. Ayrim holatlarda turistlarning ozuqasiga ko'ngil aynishi va tog' kasalligi alomatlarini keltirib chiqaruvchi moddalar qo'shilgani haqida taxminlar mavjud.
Shu tariqa "shoshilinch holat" bahonasi bilan evakuatsiya jarayoni tashkil etilgan. Firibgarlik mexanizmi doirasida bir marta amalga oshirilgan vertolyot reysi bir nechta sug'urta hodisasi sifatida rasmiylashtirilgan.
Shuningdek, soxta tibbiy xulosalar asosida sayyohlar Katmandu shifoxonalariga asossiz ravishda joylashtirilgan. Masalan, "Mountain Rescue Service" kompaniyasi 171 ta soxta evakuatsiya orqali 10,3 mln dollarlik hisob-faktura taqdim etgan.
Umumiy moliyaviy zarar miqdori 20 mln dollardan oshgani qayd etildi. Hozirda 11 nafar gumonlanuvchi hibsga olingan, qolgan shaxslarni qidirish ishlari olib borilmoqda.
Ushbu hodisa ortidan xalqaro sug'urta kompaniyalari Nepalga trekking safarlari uchun polis shartlarini qayta ko'rib chiqishni boshladi. Rasmiy idoralar moliyaviy hujjatlar va guvohlar ko'rsatmalari asosida tergovni davom ettirmoqda.
