Amazon va Meta Hindistonda to'lovlar bozoridagi raqobatni kuchaytirishni mo'ljallamoqda

Amazon va Meta kompaniyalari Hindiston to'lovlar bozorida raqobatni kuchaytirishga intilmoqda. Xorijiy OAV xabar berishicha, bu borada ular mamlakatning to'lovlar tizimini tartibga soluvchi organi bilan muzokaralar olib borishni rejalashtirmoqda. Kompaniyalarning bu harakati PhonePe va Google Pay kabi yetakchi to'lov tizimlariga qarshi qaratilgan.

Amazon Pay, WhatsApp, CRED, MobiKwik va Flipkart vakillari Hindiston Milliy To'lov Korporatsiyasi (NPCI) bilan uchrashuv o'tkazishi kutilmoqda. NPCI har oy amalga oshiriladigan milliardlab to'lov tranzaktsiyalarini boshqaruvchi yagona to'lov interfeysi (UPI)ni nazorat qiladi. Mart oyidagi statistik ma'lumotlarga ko'ra, PhonePe va Google Pay UPI tarmog'idagi jami tranzaktsiyalarning taxminan 80 foizini o'zlashtirgan.

Uchrashuvda kompaniyalar foydalanuvchilarni jalb qilish usullari, mahsulot dizayni va daromad olish strategiyalari bilan bog'liq muammolarni muhokama qilishni rejalashtirmoqda. Shuningdek, ular yangi ishtirokchilarga raqobatda teng sharoit yaratish uchun tartibga soluvchi organlardan qo'shimcha yordam va imtiyozlar so'rashlari mumkin.

Ushbu harakatlar Hindiston to'lovlar bozorida monopoliya vaziyatini oldini olishga qaratilgan. Amazon va Meta kompaniyalari raqobatni oshirish orqali iste'molchilar uchun yanada yaxshi sharoitlar yaratishni maqsad qilmoqda.