Futbol olamida ba’zan kutilmagan va qiziqarli mish-mishlar tarqalib turadi. Bu haqda Euro-football.ru xabar berdi.
Xususan, "El Nacional" nashri "Liverpul" klubi himoyachisi Virjil van Deyk faoliyatini "Barselona" safida davom ettirishni istayotgani haqida xabar berdi. Manbaga ko‘ra, niderlandiyalik futbolchi kelasi yozda erkin agent sifatida kataloniyaliklar safiga o‘tishga tayyor.
Ushbu ma’lumotlar "The Independent" nashri tomonidan taqdim etilgan xabarlarga asoslangan. Tahlilchilarning fikricha, Van Deykning "Barselona" kiyinish xonasiga qo‘shilishi jamoaga katta tajriba va yetakchilik qobiliyatini olib kirgan bo‘lardi.
Futbolchi yoshi o‘tib borayotganiga qaramay, hamon yuqori saviyada o‘yin ko‘rsatmoqda. Bundan tashqari, uning tekinga transfer qilinishi moliyaviy qiyinchiliklarni boshdan kechirayotgan Ispaniya grandi uchun juda jozibador variant hisoblanadi.
Shunga qaramay, "Barselona" bosh murabbiyi Hans-Diter Flik ushbu transfer borasida unchalik optimistik emas. Mutaxassis tarkibni yoshartirishga urg‘u berayotgan bir paytda, kelasi yozda 36 yoshga to‘ladigan himoyachining jamoaga jalb etilishi murabbiyning rejalariga mos kelmasligi mumkin.
Hozircha tomonlar mazkur mish-mishlar yuzasidan rasmiy izoh berishmagan.
Izohlar
0