«Yuventus» bosh murabbiyi Tiago Motta jamoa hujumchisi Dushan Vlaxovichning ayni damdagi holati va nima sababdan uni maydonga tushirishda ehtiyotkorlik choralarini ko'rayotgani haqida to'xtalib o'tdi. Bu haqda Euro-football.ru xabar berdi.
Ma’lumot o'rnida ta’kidlash joizki, 24 yoshli serbiyalik futbolchi uzoq davom etgan jarohatidan so'ng safga qaytgan edi. Vlaxovich o'tgan yilning noyabr oyidan buyon jarohati sababli jamoasiga yordam bera olmayotgan edi.
Joriy yilning mart oyida u mashg'ulotlarga qaytgan bo'lsa-da, ko'p o'tmay yana sog'lig'ida muammolarga duch keldi. Italiya A seriyasi doirasida «Milan»ga qarshi kechgan va 0:0 hisobidagi durang bilan yakunlangan bahsning so'nggi daqiqalaridagina futbolchi zaxiradan maydonga tushirildi.
«Uchrashuvning ikkinchi bo'limida bizga Vlaxovich kabi xususiyatlarga ega hujumchi kerak edi. Biroq u ushbu haftada mashg'ulotlarda to'liq ishtirok etmadi.
Dushan uzoq vaqt maydondan tashqarida qolgani sababli, uni o'yinga ertaroq qo'shish katta tavakkalchilik bo'lar edi», — deya murabbiyning so'zlarini keltiradi matbuot xizmati. Hujumchining Turin klubi bilan amaldagi shartnomasi joriy mavsum yakunida o'z nihoyasiga yetadi.
Hozircha tomonlar o'rtasidagi kelishuvni uzaytirish bo'yicha rasmiy ma’lumotlar e’lon qilinmagan. Jamoa rahbariyati va murabbiylar shtabi futbolchining tiklanish jarayonini diqqat bilan kuzatib bormoqda.
