Rafinya mashg'ulotlarga qaytmoqda: "Barselona" vingeri safga qaytishga yaqin "Barselona" klubi vingeri Rafinya jarohatidan so'ng safga qaytishga yaqin turibdi. Bu haqda Euro-football.ru xabar berdi.
Braziliyalik futbolchi jarohatidan forig' bo'ldi va kelasi haftaning boshidan jamoaning umumiy mashg'ulotlariga qo'shiladi. Bu haqda jurnalist Ashraf ben Ayad xabar bermoqda.
Eslatib o'tamiz, Rafinya mart oyi oxirida Braziliya terma jamoasi safida jarohat olgan edi. 29 yoshli futbolchi kataloniyaliklarning so'nggi beshta uchrashuvini, jumladan, Chempionlar ligasi doirasida "Atletiko"ga qarshi kechgan har ikkala o'yinni ham o'tkazib yubordi.
Madrid klubi bilan bahslar "Barselona" uchun muvaffaqiyatsiz yakunlangan edi. Ma'lumot o'rnida, "Barselona" 25-aprel, shanba kuni Ispaniya chempionati doirasida "Xetafe"ga qarshi maydonga tushadi.
Shundan bir hafta o'tib esa jamoani "Osasuna"ga qarshi bahs kutmoqda. Rafinyaning aynan ushbu uchrashuvlarda maydonga tushishi kutilmoqda.
Futbolchining safga qaytishi mavsumning hal qiluvchi qismida kataloniyaliklar uchun muhim ahamiyatga ega.
