O'zbekistonda madaniyat va san'at sohasini yangi bosqichga olib chiqishga qaratilgan muhim tashabbuslar amalga oshirilmoqda. 2026 yil 1 iyuldan boshlab Qoraqalpog'iston Respublikasi, barcha viloyatlar hamda Toshkent shahrida tajriba tariqasida har bir hududda bittadan “Madaniyat mehmonxonasi” madaniy klasterini barpo etish rejalashtirilgan. Ushbu innovatsion loyihalarning asosiy maqsadi — hududlarda madaniy hayotni faollashtirish, ijodkorlarni qo'llab-quvvatlash va aholi uchun madaniy xizmatlar doirasini kengaytirishdan iborat. “Madaniyat mehmonxonasi” formatdagi klasterlar orqali san'at, ijod, ta'lim va turli madaniy tadbirlar uchun zamonaviy va qulay infratuzilma yaratilishi kutilmoqda. Bu esa o'z navbatida yangi iste'dodlarni kashf etish va ularni rivojlantirishga xizmat qiladi. Shu bilan birga, ta'lim tizimida ham sezilarli yangilanishlar joriy etilmoqda. 2026–2027 o'quv yilidan boshlab Respublika musiqa va san'at texnikumi hamda Respublika estrada va tsirk texnikumida mutlaqo yangi kasbiy ta'lim dasturlari asosida o'qitish yo'lga qo'yiladi. Unga ko'ra, 2 yillik boshlang'ich kasbiy ta'lim, 6 oydan 2 yilgacha bo'lgan o'rta kasbiy ta'lim va kamida 2 yillik o'rta maxsus kasbiy ta'lim bosqichlari joriy etiladi. Bundan tashqari, ushbu ta'lim muassasalarida bakalavriat dasturlari bilan uyg'unlashgan “2+2” shaklidagi ta'lim tizimiga ham ruxsat berilishi belgilandi. Bu format talabalarga nazariy bilim bilan birga amaliy ko'nikmalarni ham mustahkam o'zlashtirish imkonini beradi. Qaror doirasida Madaniyat vazirligi tizimidagi ixtisoslashtirilgan san'at maktablariga qabul tartibi ham aniq belgilab berildi. Endi o'quvchilar musiqa yo'nalishiga 5-sinfdan, raqs, teatr, xalq ijodiyoti hamda tasviriy va amaliy san'at yo'nalishlariga esa 9-sinfdan qabul qilinadi. Ushbu maktablarda maktab-internatlar uchun amal qiluvchi imtiyozlar tatbiq etiladi. Jumladan, ta'lim va yashash xarajatlari davlat byudjeti hisobidan qoplanadi, ovqatlanish esa davlat va ota-onalar mablag'lari asosida moliyalashtiriladi. Yana bir muhim yangilik — mazkur ta'lim muassasalari bitiruvchilariga bolalar musiqa va san'at maktablarida o'qituvchilik faoliyati bilan shug'ullanish huquqi beriladi. Bu esa sohada kadrlar yetishmovchiligini bartaraf etish va yosh mutaxassislar uchun yangi imkoniyatlar yaratishga xizmat qiladi. Qisqasi, yangi tashabbuslar nafaqat madaniyat sohasini jonlantiradi, balki ijodiy muhitni kuchaytirib, kelajak avlod uchun keng imkoniyatlar eshigini ochadi. Shuhrat Razzakov «UZ.NEWS» muharriri + UZ.NEWS saytini Googlega qo'shing Ctrl Enter Xato topdingizmi? Iborani ajratib Ctrl+Enter tugmasini bosing Yoqdi 0 Yoqmadi 0
