Rossiyalik tennischi Daniil Medvedev "Real Madrid" klubining uy stadioni hisoblangan "Santyago Bernabeu"da mashg'ulot o'tkazishdan bosh tortdi. Bu haqda Euro-football.ru xabar berdi.
Sportchi bunday qarorga kelishining asosiy sababi sifatida stadiondagi kort qoplamasining o'ziga xosligini ko'rsatgan. Medvedevning ta'kidlashicha, Madridda o'tayotgan "Masters" seriyasiga kiruvchi turnirning asosiy kortlari va "Santyago Bernabeu"dagi mashg'ulot maydoni o'rtasida sezilarli tafovut mavjud.
Tennischi mashg'ulot jarayonida boshqa turdagi qoplamaga moslashish o'yin davomida texnik xatolarga va noqulayliklarga sabab bo'lishidan xavotirda ekanini bildirgan. "U yerdagi kort qoplamasi boshqacha bo'lishidan qo'rqaman.
Mashg'ulotda bor kuchingni sarflab, keyin markaziy kortdagi o'yinda to'pni aniq tushira olmasliging mumkin. Shu bois tavakkal qilmaslikka qaror qildim.
Garchi g'oyaning o'zi juda qiziqarli bo'lsa-da, sport natijasi men uchun muhimroq", — deya tennischining so'zlarini keltirmoqda "Chempionat" nashri. Ma'lumot uchun, avvalroq italiyalik tennischi Yannik Sinner mazkur stadionda mashg'ulot o'tkazgan edi.
Sinner tashrif davomida "Real Madrid" darvozaboni Tibo Kurtua va hujumchi Kilian Mbappe bilan ham uchrashishga muvaffaq bo'lgan.
