Luis Enrike: «Mening e'tiborim milliy terma jamoalarga emas, balki PSJga qaratilgan» PSJ bosh murabbiyi Luis Enrike jamoa darvozaboni Lyuk Shevalye atrofidagi vaziyat bo'yicha o'z fikrini bildirdi. Bu haqda Euro-football.ru xabar berdi.
Ma'lumki, rossiyalik darvozabon Matvey Safonov bilan raqobatda imkoniyatni boy berayotgan Shevalye Fransiya terma jamoasi safida Jahon chempionatiga borolmaslik xavfi ostida qolmoqda. Luis Enrikening ta'kidlashicha, u o'yinchilarga maydonda vaqt ajratish bo'yicha qaror qabul qilayotganda milliy terma jamoalar manfaatlarini inobatga olmaydi.
Murabbiy o'zining asosiy vazifasi klub muvaffaqiyatini ta'minlash ekanini qayd etdi. «Men PSJ murabbiyi hisoblanaman.
Qolgan narsalar meni qiziqtirmaydi. Bor e'tiborimni faqat PSJga qaratganman», — deya Luis Enrikening so'zlarini keltirmoqda Foot Mercato nashri.
Ma'lumot uchun, Matvey Safonov qish mavsumi boshidan buyon Parij klubining asosiy darvozaboni sifatida maydonga tushmoqda. Eslatib o'tamiz, o'tgan shanba kuni bo'lib o'tgan uchrashuvda PSJ safarda «Anje» jamoasini 3:0 hisobida mag'lub etgan edi.
Ushbu g'alaba parijliklarning turnir jadvalidagi peshqadamligini yanada mustahkamladi.
