«Real Madrid» klubiga tegishli bo'lgan va hozirda ijara asosida Fransiyaning «Lion» jamoasida to'p surayotgan hujumchi Endrikning otasi o'g'lining so'nggi vaqtlardagi natijalari va ruhiy holati haqida to'xtalib o'tdi. Bu haqda Euro-football.ru xabar berdi.
Uning so'zlariga ko'ra, yosh futbolchi uchun maydondagi erkinlik va zavq olish jarayoni muvaffaqiyatning asosiy omili hisoblanadi. «O'g'lim futbolga doimo ko'ngilochar bog'ga qaragandek qaraydi.
U zavqlanish va tabassum bilan o'ynasa, o'zining eng yaxshi qirralarini namoyon eta oladi. Hozirda uning yuzida yana tabassum paydo bo'ldi, chunki u muntazam ravishda maydonga tushmoqda va o'z o'yinidan zavq olyapti», — deya Endrikning otasidan iqtibos keltirdi «Madrid Extra» nashri.
Ma'lumot uchun, «Lion» braziliyalik iqtidor egasini «Real Madrid»dan joriy mavsum yakuniga qadar sotib olish huquqisiz ijara ko'rinishida o'z safiga qo'shib olgan. Endrik Fransiya klubi tarkibida barcha turnirlar doirasida 17 ta uchrashuvda ishtirok etib, 7 ta gol urishga va 7 ta golli uzatmani amalga oshirishga muvaffaq bo'ldi.
Hujumchining «Real Madrid» bilan amaldagi shartnomasi 2030 yil 30 iyungacha mo'ljallangan.
