Andijon viloyatining tabiati, toza havosi va o‘ziga xos relyefga ega adirliklari bugungi kunda ekoturizm yo‘nalishida yangi imkoniyatlar markaziga aylanmoqda. Bu haqda Zamin.uz xabar berdi.
O‘zbekiston Respublikasi Prezidenti Shavkat Mirziyoyev viloyatga tashrifi doirasida Asaka tumanidagi Yangi hayot hududida tashkil etilgan yirik ekoturizm va dam olish maskanida bo‘lib, u yerda yaratilgan sharoitlar bilan yaqindan tanishdi. Umumiy maydoni 192 gektarni tashkil etuvchi ushbu loyiha hududning turistik salohiyatini oshirish hamda aholi uchun sifatli hordiq chiqarish muhitini yaratishga qaratilgan.
Davlat rahbarining bevosita topshirig‘i va tashabbusi bilan amalga oshirilgan mazkur majmua atrof-muhitni asrash, hududning ekologik holatini yaxshilash hamda mahalliy aholi uchun yangi ish o‘rinlarini yaratishda muhim ahamiyat kasb etadi. Ekoturizm markazi nafaqat viloyat aholisi, balki hududga tashrif buyuruvchi sayyohlar uchun ham qulay infratuzilma bilan ta’minlanishi ko‘zda tutilgan.
Mazkur loyihaning ishga tushirilishi mintaqada turizm sohasini rivojlantirish hamda hudud iqtisodiyotini diversifikatsiya qilish borasidagi strategik maqsadlarga xizmat qiladi.
Izohlar
0