O‘zbekiston Respublikasi Prezidenti Shavkat Mirziyoyev mamlakatimizda sun’iy intellekt texnologiyalarini rivojlantirish bo‘yicha amalga oshirilayotgan ishlar hamda kelgusidagi ustuvor vazifalarga bag‘ishlangan taqdimot bilan tanishdi. Bu haqda Zamin.uz xabar berdi.
Yig‘ilish davomida sohadagi bugungi holat tahlil qilinib, mavjud imkoniyatlardan samarali foydalanish hamda tizimli ekotizimni shakllantirish masalalari muhokama qilindi. So‘nggi yillarda raqamli texnologiyalar va sun’iy intellekt yo‘nalishida olib borilgan keng ko‘lamli islohotlar o‘z samarasini bermoqda.
Xususan, O‘zbekistonning bu boradagi xalqaro nufuzi sezilarli darajada oshdi. Mamlakatimiz sun’iy intellektga tayyorlik bo‘yicha xalqaro reytingda birdaniga 25 pog‘ona yuqorilab, 62-o‘rindan joy oldi.
Bu ko‘rsatkich davlatimiz tomonidan texnologik taraqqiyotga qaratilayotgan e’tiborning yaqqol ifodasidir. Taqdimot jarayonida davlat rahbari sohani yanada rivojlantirish uchun qator strategik vazifalarni belgilab berdi.
Xususan, sun’iy intellekt yechimlarini iqtisodiyot tarmoqlari hamda davlat boshqaruviga joriy etish, yuqori malakali kadrlarni tayyorlash hamda innovatsion loyihalarni qo‘llab-quvvatlash masalalariga alohida urg‘u berildi. Kelgusida mazkur yo‘nalishdagi ishlarni jadallashtirish va xalqaro hamkorlikni kengaytirish orqali O‘zbekistonning raqamli iqtisodiyotdagi o‘rnini yanada mustahkamlash ko‘zda tutilgan.
Izohlar
0