Andijon polkasi rasman Ginnes rekordlar kitobiga kiritildi

Bugun, 24 iyun kuni Andijon shahrida o‘tkazilgan ommaviy madaniy tadbir tarixiy ahamiyat kasb etdi. Bu haqda Zamin.uz xabar berdi.

Viloyat hokimligi axborot xizmatining ma’lum qilishicha, hududda tashkil etilgan “Andijon polkasi” fleshmobi 20 ming nafar ishtirokchini bir maydonda jamlashga muvaffaq bo‘ldi. Ushbu ommaviy chiqish natijalari xalqaro ekspertlar tomonidan baholanib, Ginness rekordlar kitobiga rasman kiritildi.

Mazkur keng ko‘lamli loyihaning tashkil etilishidan ko‘zlangan asosiy maqsad milliy raqs san’atimizni jahon hamjamiyatiga keng targ‘ib qilish hamda o‘zbek madaniyatining o‘ziga xos jihatlarini xalqaro miqyosda namoyish etishdan iborat. Shuningdek, mazkur rekord o‘rnatilishi orqali Andijon polkasi kabi qadimiy raqs turlarining saqlanib qolishi va yosh avlod o‘rtasida ommalashuviga hissa qo‘shish ko‘zda tutilgan.

Rekord qayd etilgan ushbu jarayon viloyatdagi madaniy hayotning yorqin sahifalaridan biriga aylandi va yurtimiz nomini xalqaro miqyosdagi nufuzli ro‘yxatda qayd etilishini ta’minladi. Tadbirda ishtirok etgan minglab yurtdoshlarimiz birgalikda ijro etgan raqs milliy san’atimizning qudrati va birligini yaqqol namoyon qilib, tomoshabinlarda katta taassurot qoldirdi.