Namangan gullar festivalida Rayhonning chiqishi tomoshabinlar e’tiboriga tushdi

Bugun, 24 may kuni Namangan shahrida 65-Xalqaro Gullar festivalining tantanali ochilish marosimi bo‘lib o‘tdi. Bu haqda Zamin.uz xabar berdi.

Har yili an’anaviy tarzda tashkil etiladigan mazkur bayram bu yil ham o‘zining ko‘lami, turli xil gul kompozitsiyalari hamda o‘zgacha manzaralari bilan tashrif buyuruvchilarni hayratga solmoqda. 12 iyulgacha davom etadigan ushbu madaniy tadbir davomida viloyat markazi chinakam gul shahriga aylanadi.

Joriy yilgi festival Namangan uchun tarixiy voqea sifatida yodda qoladigan bo‘ldi. Shahar “jamoa bo‘lib bir oy davomida eng ko‘p ekilgan gullar” nominatsiyasi bo‘yicha Ginnes rekordini o‘rnatib, xalqaro miqyosda e’tirof etildi.

Tegishli sertifikat tantanali ravishda viloyat mutasaddilariga topshirildi. Festival doirasida boy madaniy-ko‘ngilochar dasturlar ham yuqori saviyada tashkil etilgan.

Sahna chiqishlarida ishtirok etayotgan mashhur san’atkorlar tomoshabinlarga bayramona kayfiyat ulashmoqda. Xususan, estrada xonandasi Rayhon festival sahnasida chiqish qilib, o‘zining repertuaridagi taniqli taronalari bilan yig‘ilganlarning olqishiga sazovor bo‘ldi.

Xonandaning sahnadagi ko‘rinishi ham alohida e’tirofga loyiq bo‘ldi. Rayhon bayram ruhiga hamohang tarzda gullar bilan bezatilgan qizil libosda namoyon bo‘lib, o‘zining nafis didi va o‘ziga xos uslubi bilan barchaning e’tiborini tortdi.