Shanhay universiteti tadqiqotchilari optik maʼlumotlarni saqlash texnologiyalari rivojida yangi bosqichni boshlab beradigan ilmiy yutuqni qoʻlga kiritishdi. Bu haqda Zamin.uz xabar berdi.
Ixbt.com nashri tarqatgan maʼlumotlarga koʻra, olimlar tomonidan ishlab chiqilgan koʻp oʻlchamli optik yozish usuli raqamli axborot sigʻimini keskin oshirish imkonini beradi. Mazkur innovatsion yechim bitta uch oʻlchamli nuqtada anʼanaviy ikki holatli tizim oʻrniga bir vaqtning oʻzida 1024 ta turli holatni qayd etish qobiliyatiga ega.
Amaliy jihatdan olib qaraganda, bu texnologiya har bir alohida nuqta orqali 10 bit axborotni kodlash imkoniyatini yaratadi. Bunday yondashuv optik disklarda maʼlumotlarni saqlash zichligini bir necha barobar oshirish va kelajakda katta hajmdagi axborotlarni yanada ixcham hamda samaraliroq saqlash tizimlarini yaratish uchun muhim zamin boʻlib xizmat qiladi.
Ilmiy ishlanma maʼlumotlarni qayta ishlash va saqlash infratuzilmasida sifat jihatidan yangi imkoniyatlarni ochishi kutilmoqda.
Izohlar
0