Qozog‘istonning Olmaota viloyati, Qaskelen shahridagi ta’lim muassasalaridan birida jamoat tartibini buzish bilan bog‘liq noxush holat yuz berdi. Bu haqda Zamin.uz xabar berdi.
Nur.kz axborot manbasiga ko‘ra, 11 noyabr kuni tushdan keyingi tanaffus vaqtida notanish erkak maktab hududiga ruxsatsiz kirib kelgan. Guvohlarning ta’kidlashicha, yarim yalang‘och holatdagi shaxs dastlab maktab hovlisida tartibsiz harakatlar bilan yugurib yurgan.
Vaziyat keskinlashib, mazkur shaxs o‘quv xonalaridan birining derazasini sindirib, o‘quvchilar darsga tayyorgarlik ko‘rayotgan xonaga bostirib kirgan. Mazkur voqea aks etgan videolar ijtimoiy tarmoqlarda keng tarqalib, jamoatchilik orasida jiddiy xavotirlarni keltirib chiqardi.
Hodisa oqibatida o‘quvchilar va o‘qituvchilar tarkibi sarosimaga tushgan. Hozirgi vaqtda mahalliy huquqni muhofaza qiluvchi organlar holat yuzasidan surishtiruv ishlarini olib bormoqda.
Maktab ma’muriyati va mas’ul idoralar ta’lim dargohlarida xavfsizlik choralarini kuchaytirish hamda o‘quvchilarning psixologik holatini barqarorlashtirish bo‘yicha tegishli chora-tadbirlarni ko‘rmoqda. Voqeaning sabablari va erkakning shaxsi aniqlanmoqda.
Izohlar
0