Toshkentdagi omborxonada yuz bergan yirik yong‘in o‘chirildi

Toshkentning Yashnobod tumanida omborxona yondi

29 aprel kuni Toshkent shahrining Yashnobod tumanida joylashgan omborxonalarning birida yong'in chiqdi. Bu haqda Zamin.uz xabar berdi.

Poytaxt Favqulodda vaziyatlar bosh boshqarmasi tomonidan berilgan ma'lumotga ko'ra, hodisa Toshkent xalqa avtomobil yo'li ko'chasidagi ombor hududida qayd etilgan. Favqulodda vaziyatlar xizmatiga yong'in to'g'risidagi xabar soat 17:05 da kelib tushgan.

Qutqaruv ekipajlari voqea joyiga uch daqiqa ichida, ya'ni soat 17:08 da yetib borgan. Ko'rilgan tezkor choralar natijasida alov soat 17:30 da qurshab olindi.

Hozirgi vaqtda yong'inni butunlay o'chirish bo'yicha ishlar olib borilmoqda. Rasmiy ma'lumotlarga ko'ra, hodisa oqibatida jarohatlanganlar yoki halok bo'lganlar mavjud emas.

Mutaxassislar vaziyat to'liq nazorat ostida ekanini ma'lum qildi. Hozirda yong'in kelib chiqishiga sabab bo'lgan omillar o'rganilmoqda.

Favqulodda vaziyatlar bosh boshqarmasi surishtiruv yakunlari bo'yicha qo'shimcha axborot taqdim etishini bildirdi.