SoftBank robotlar yordamida ma'lumotlar markazlari qurish loyihasini boshladi

SoftBank AQShda robotlashtirilgan server markazlarini qurish loyihasini boshladi

Yaponiyaning SoftBank konglomerati AQSh hududida server fermalarini barpo etish jarayonini tezlashtirish va xarajatlarni kamaytirish maqsadida Roze AI korxonasini tashkil etmoqda. Bu haqda Zamin.uz xabar berdi.

Ixbt.com nashrining yozishicha, loyiha doirasida an'anaviy qurilish brigadalari o'rniga avtonom robotlardan foydalanish ko'zda tutilgan. Robotlar payvandlash, konstruksiyalarni yig'ish va og'ir yuklarni tashish kabi vazifalarni kechayu kunduz amalga oshirishi kutilmoqda.

Financial Times nashri SoftBank yangi kompaniyani 2026 yilning ikkinchi yarmida dastlabki ommaviy taklifga (IPO) chiqarishni rejalashtirayotganini ma'lum qildi. Startapning birjadagi bahosi 100 mlrd dollarga yetishi mumkin.

Wall Street Journal ma'lumotlariga ko'ra, Roze AI tarkibiga SoftBank tomonidan avvalroq sotib olingan ABB robototexnika bo'linmasi va Ampere Computing chiplar ishlab chiqaruvchisi kabi aktivlar birlashtiriladi. Konglomerat asoschisi Masayoshi Son ushbu ekotizim orqali Amerika bozorida yuqori ko'rsatkichlarga erishishni maqsad qilgan.

Shunga qaramay, tahlilchilar loyihaga ehtiyotkorlik bilan munosabat bildirishmoqda. Xususan, 2023 yilda Zume robo-pitseriyasi bilan bog'liq muvaffaqiyatsizlik investorlarda xavotir uyg'otgan.

Hozircha tayyor mahsulotiga ega bo'lmagan kompaniyaning 100 mlrd dollarga baholanishi va qisqa muddatli IPO rejalari soha mutaxassislari tomonidan shubha ostiga olinmoqda. Sanoatni avtomatlashtirish yo'nalishida Jeff Bezos ham faollik ko'rsatmoqda.

Uning 6,2 mlrd dollar sarmoya yo'naltirilgan Project Prometheus startapi ham mazkur sektorni modernizatsiya qilishni ko'zda tutadi. SoftBank esa jismoniy infratuzilma yetishmovchiligi muammosini aynan robotlashtirilgan texnologiyalar yordamida hal etishga urinmoqda.